पुरस्कार व सन्मान

सह्याद्री रत्न पुरस्कार २०२5

श्री. उमेश झिरपे

सहयाद्री मित्र संमेलनाचे 5 व 6 जुलै 2025 रोजी तिसरे पर्व साजरे होत आहे. पहिल्या वर्षी श्री. हरिशभाई कपाडिया व दुसऱ्या वर्षी श्री आनंद पाळंदे यांना "सहयाद्री रत्न पुरस्कार" प्रदान करण्यात आला. सह्याद्रीच्या कुशीत दिल्या जाणाऱ्या ह्या सर्वोच्च पुरस्कारासाठी तितक्याच तोला मोलाच्या व्यक्तीची निवड केली जाते. यात त्यांचे या क्षेत्रातील कर्तृत्व, योगदान, प्रेम बघितले जाते . या निकषावर श्री. उमेश झिरपे हे निर्विवाद व आघाडीवरील व्यक्तिमत्व आहे. श्री. उमेश झिरपे यांना प्रेमाने सर्वजण "मामा" नावाने सबोधतात. मामा नावातच सर्व काही येते, जो सर्वाना सोबत घेऊन चालतो, ज्याला कोणताही गर्व शिवत नाही. सर्वांचे मत विचारात घेऊन योग्य निर्णय घेतो. जो सर्वांच्या विश्वासास पात्र ठरतो. गिरीप्रेमी संस्था, पुणे ही संस्था श्री आनंद पाळंदे काका, उषाप्रभा ताई पागे या जेष्ठ धुरीणांनी स्थापन केली. त्या संस्थेला सर्वोच्च स्थानी घेऊन जाण्याचे काम उमेश मामा झिरपे यांनी केले आहे. हिमालयातील अवघड अशा अष्टहजारी मोहिमा असतील, अनेक साहसवीरांना घडविण्याचे काम मामांनी केले आहे. नुकताच महामहिम राष्ट्रपती यांच्या हस्ते तेनजिंग नोर्गे राष्ट्रीय साहस हा सर्वोच्च पुरस्कार प्रदान करण्यात आला. आणि आत्ता सहयाद्रीतील सर्वोच्च पुरस्कार ही त्यांना जाहीर झाला आहे. त्यांचे "सकाळ" वर्तमान पत्रातील प्रसिद्ध होणारे माऊंटेनरिंग चे अनुभव वाचनीय असतात. ते लेख वाचताना आपण त्या मोहिमेचा भाग कधी होऊन जातो हे कळतच नाही . इतके ते अनुभव जिवंत शब्दबद्ध केलेले असतात. सहयाद्री मित्र पुरस्कार उमेश (मामा) झिरपे यांना जाहीर झाल्यानंतर त्यांचा उचित सन्मान होत आहेच त्यासोबतच या पुरस्काराचीही उंची वाढली आहे. आम्ही सह्य प्रेमी नाशिककर त्यांच्या स्वागतासाठी आतुर झालेलो आहोत.